पुणे जिल्ह्यातील चाकण येथे 'एनझेन बायोसायन्सेस लि.' या कंपनीला मोठा सायबर फटका बसला आहे. एका अज्ञात आरोपीने कंपनीच्या एका महिला अधिकाऱ्याचा ईमेल हॅक करून तब्बल १.३९ कोटी रुपयांची (USD १,५९,०६०) आर्थिक फसवणूक केली आहे. ही घटना ०२ एप्रिल २०२५ ते १३ मे २०२५ दरम्यान घडली असून, अज्ञात व्यक्ती आणि बनावट बँक खातेधारकांविरुद्ध गुन्हा दाखल करण्यात आला आहे.
नेमकं काय घडलं?
ईमेल हॅकिंग आणि डेटा चोरी: आरोपीने कंपनीतील 'मिस डॉन मिलर' नावाच्या अधिकाऱ्याचा ईमेल आयडी हॅक केला.
फसवणुकीची पद्धत: हॅक केलेल्या ईमेलमधून आरोपीने बनावट माहिती शेअर केली. त्याने ईमेलमधील हेडरची माहिती चोरून अनधिकृतपणे डोमेनचा ॲक्सेस मिळवला.
बनावट बँक खात्याचा वापर: आरोपीने बनावट बँक खात्याची माहिती ईमेलद्वारे कंपनीच्या अकाउंट पेएबल टीमला पाठवली. या माहितीच्या आधारे कंपनीने पेमेंट केले.
ईमेल डिलीट करून पुरावा नष्ट करण्याचा प्रयत्न: आरोपीने इनबॉक्समधील ईमेल सॉफ्ट डिलीट केले आणि डिलीटेड आयटम्समधूनही ते काढून टाकले, जेणेकरून पुरावा सापडू नये.
आर्थिक नुकसान: या सर्व प्रकारामुळे कंपनीची १,५९,०६० अमेरिकन डॉलर्सची फसवणूक झाली, ज्याचे भारतीय रुपयांमध्ये मूल्य सुमारे १.३९ कोटी आहे.
य घटनेमुळे कंपन्यांना आणि व्यक्तींना सायबर सुरक्षेबाबत अधिक सतर्क राहण्याचा इशारा मिळाला आहे. ईमेल सुरक्षित ठेवणे आणि अनोळखी ईमेल्सवर विश्वास न ठेवणे किती महत्त्वाचे आहे, हे या घटनेने पुन्हा एकदा सिद्ध झाले आहे.